Permisividade co poderoso – En accións similares, o valenciano Mateu Lahoz, sancionou aos xogadores celestes e deixou impune aos blaugranas

Foto. O colexiado Mateu Lahoz dialogando con Alexis Sánchez despois de amosarlle o cartón en Balaídos // Sport.es

Voltou a liga despois do parón a causa dos compromisos internacionais e o fixo cun moi bo sabor de boca para o conxunto da cidade olívica. O punto colleitado onte fronte ao F.C.Barcelona é un punto que sabe a doce. Neste encontro contra o conxunto máis poderoso do campionato, esa sorte que tan esquiva foi co Celta ao longo de toda a tempada, estivo un pouco máis presente cun gol nos derradeiros suspiros do partido do capitán Oubiña. Moi merecedor de dito gol despois de tódolos calvarios que tivo que pasar, e coma non, chegou fronte ao mellor rival posibel.

Esperemos que a melloría amosada polo plantel de Resino fronte ao Barça non sexa só auga dun encontro e se plasme en tódolos partidos que quedan ata o final do campionato. Aínda que houbo algunhas lagunas, sobre todo e a máis salientable foi a falla de axuda do ‘Negro’ Fernández a Jony ao longo de todo o encontro, se o Celta mantén esta liña e ten máis acerto ofensivo, a milagre da salvación está un pasiño, ou puntiño, máis preto de acadarse.

O valenciano Mateu Lahoz sancionou un total de 26 infraccións no encontro que disputaron na tarde do sábado o Celta fronte ao Barcelona en Balaídos. Das 26 faltas once foron a favor do conxunto local e quince a prol do equipo visitante. Destas 26 faltas sancionadas polos colexiados, sete foron merecedoras de cartón amarelo.

Por parte do Celta viron cartón Gustavo Cabral no minuto 31 da primeira metade, o goleador Borja Oubiña por facerlle obstrucción preto da área a Messi no minuto 40 da primeira metade, Roberto Lago xa na reanudación, no minuto 16; e Augusto, o Negro, Fernández xa case no final do encontro, no minuto 41.

Por parte do F.C.Barcelona os tres xogadores aos que Mateu Lahoz amosou cartón amarelo foron a Fábregas no minuto 24 da primeira metade por protestar un fora de banda, Alexis Sánchez por unha suposta man no minuto 18 da reanudación; e xa por último a Sergio Busquets case rematado o encontro, no mituto 42 da segunda metade.

Foto: Dous dos goleadores do partido entre Celta e Barça // deportes.starmedia.es

Mateu Lahoz e os seus asistentes pitaron un total de once foras de xogo, cinco deles foron a favor do Celta e seis para o conxunto blaugrana.

Foi un partido bastante doado para os colexiados onde se viu que os árbitros non miran igual para ámbolos dous conxuntos cando o contrincante e o Barça ou o Madrid. Ao longo do encontros houbo accións semellantes entre Celta e Barcelona, que si foron sancionadas para o cadro vigués e non así para o cadro da cidade Condal. Porén, en liñas xerais, o valenciano estivo bastante acertado a hora de dirixir o partido.

Compre dicir que Mateu Lahoz non sancionou un posibel penalti de Bartra sobre Park aínda co cero a cero no marcador. Non obstante, é certo que ámbolos dous xogadores entran na área forcexando. Outra sanción que quedou impune e un cobadazo de novo de Marc Bartra sobre Mario Bermejo que, no salto en liña de tres cuartos da parcela defensiva do F.C. Barcelona, lle meteu o cóbado ao xogador cántabro do Celta polas costas.

Agora toca facer bo este punto o vindeiro domingo fronte ao Rayo Vallecano. O encontro é tamén na casa e o Celta debe volver a facerse forte en Balaídos xa que por Vigo pasarán case que tódalas opcións que teñen para manterse na categoría.

Lucas Vázquez Atlético